Manifesta-Festa: Ekintza komunitario kolektiboetarako estrategia estetikoak eta performatiboak
Manifesta-Festa 2022ko udazkeneko egun batean gertatuko da… edo datorren urteko udaberriko egun batean… Garrantzitsuena izango da eguraldi ona egitea denok kalera irten gaitezen. Baina, era berean, oso garrantzitsua da jakitea Manifesta-Festa benetan gertatuko dela, eta Amurrioko Umeen Elkarguneko haur guztiak bertan izango direla, azken hilabeteotan antolatu duten topaketa handia burutzen. Orduan, Manifesta-Festa benetazkoa izango da: Amurrioko herritar guztientzako ekitaldi bat izango da, adin guztietako pertsonen arteko topaketa bat, manifestazio bat, eta adiskidetasunaren potentzial politikoa aldarrikatzeko festa bat; gure bizilagunak ezagutzeko eta gure burua komunitate gisa aitortzeko tarte bat; elkarrekin ondo pasatzeko eta dantzatzeko jaieguna.
Upper Street-eko festa 1996ko udako egun batean gertatu zen, Londresen. Zerua lainotuta egon zitekeen, baina horrek ez zuen axola; zangaluzeek, musikak eta dantzariek M41 errepidea hartu zuten bederatzi ordu iraun zuen festa batean zehar. Bertan, zortzi mila lagunek egin zuten dantza acid house-aren erritmoan, jaia apaintzen zuten loredun pankarten eta oihalezko eguzkien artean. Jaia bera, orduan, “kalea eta hiri-espazioaren erreklamazio politiko gisa altxatu zen”. Ramírez Blancok Utopías Artísticas de Revuelta testuan dioen bezala, tresna eta estrategia estetikoak garrantzitsuak dira politika egiteko bitarteko artistikoak erabili nahi direnean, eta are gehiago, “estetika horiek praktika utopikoko espazioak eratzeko balio dutenean”.
Kontua da gizarte desberdinak formulatzeko aukera emango duten uneak edo egoerak bultzatzea, edo, Manifesta-Festaren kasuan bezala, komunitate elkartuagoak sustatuko dituzten ekintzak abiaraztea; dantzak eta jolasak artikulatuko duten harremanetarako espazio bat formulatzeko desiratik abiatuta, auzotarren arteko adiskidetasunaren eta elkar-zaintzaren garrantzia aldarrikatuko dutenak.
Upper Street-eko jaia erreferentzia handia da Manifesta-Festarentzat, ez baitu -azken honek- ohiko manifestazio edo festa bat izan nahi; bestelako zerbait izan nahi du, ordea, Manifesta-Festak, dena batera izan nahi du. Izan ere, Manifesta-Festak jaia bera aldarrikapen gisa ulertu nahi du, dantza pertsonen aglutinatzaile gisa, janaria kultura eta esperientzien transmisore gisa, eta jolasak eta historiak elkar nahasteko, elkar ezagutzeko, eta gure burua aniztasunetik egituratzen den komunitate bereko kidetzat onartzeko elementu gisa. Horregatik, azken hilabeteotan, estetika biribilak, pikudunak eta dantzariak izango dituen kalejira eta festa bat prestatzen aritu gara Amurrioko Umeen Elkargunean; kolore biziez, konfetiz, hainbat pisutako bizikletez eta bozgorailu erraldoiez gainezka egongo den jaieguna. Jolasteko txokoz beteta egongo den plaza bat imajinatzen aritu gara, sekretuak eta inoiz kontatu ez diren istorioak elkarri kontatzeko tokiak izango dituena, elkarrekin meriendatzeko mahai handi bat izango duena, eta zeinean festa amaiera sinestezin bat egongo den, guztion abesti kuttunak bilduko dituena; herria musikaz eta kolorez josiko duen eztanda bat izango da gure Manifesta-Festa.
Proposamen honen alderdi grafiko eta estetikoetan pentsatzeko beste erreferentzia bat Moy Santana eta Antonio José Albertos-en La Ruta Gráfica izan da, 80ko hamarkadan ezaguna izan zen la ruta del bakalao-ren konpasera sortu ziren kartelak eta flyerrak biltzen dituen argitalpena. Bertan, Paco Rocak “jolasaren botere politikoa” aldarrikatzen du, eta musika saioak topaleku ziren une historiko batean sortutako kartelak, garai hartako Valentziak bizi zituen kultura-joeren bozgorailu gisa azaltzen ditu. Garai hartako sorkuntza grafikoek koloreekin edertzen zuten garai gris batetik esnatzen ari zen hiria.
Horregatik, irudia ere Manifesta-Festaren kontakizunaren parte izango da, Umeen Elkarguneko haurrek prestatzen aritu diren jai handiaren aurreko egunetan Amurrioko paretak eta postontziak beteko dituzten kartel eta gonbidapenak direla medio. Izan ere, 2022ko udazkenaren egun horreko aurreko egunetan, herritar guztiek beraien komunitateko festa handirako gonbidapena jasoko dute; inor bakarrik egongo ez den festa horretarako gonbiteak.
«Manifesta-Festa Amurrioko Umeen Elkargunean sortutako proposamena da. Umeen Elkargunea Amurrioko Udalak abian jarritako ekimena da, tokiko haurren parte-hartzea sustatzeko helburua duen proiektua. Umeen Elkargunea herriko 20 haurrek osatzen dute, eta ikasturte honetan herria eta komunitatearen inguruko proposamenak irudikatzeko eta prototipatzeko elkarrekin lan egin dugu, umeek beraien herria eta komunitatearekiko dituzten nahi eta beharretatik abiatuta»
