IU! Gazte, Iurretako Gazteria Zerbitzua

Arazoa eta erronka

Iurretako Gazteria Zerbitzua sortzeko beharra Udalak hautemandako errealitate batean oinarritu zen: udalerrian ez zegoen bertako gazteen lehentasunei eta beharrei berariaz zuzendutako zerbitzu-eskaintzarik. Nerabe talde batek sinadurak bildu zituen, elkartzeko eta aisialdiko jarduerak garatzeko espazio bat eskatuz. Horrek aktibatu zuen prozesua.

Berariazko eskaintzarik ez zegoenez, udalerriko gazteek eskaria egin zutenez eta Udalak bi gai horiek ikuspegi estrategikoago batetik jorratzeko asmoa zuenez (gazteria arloan etorkizunean garatu behar ziren ekintzen oinarriak ezartzeko), posible izan zen prozesua martxan jartzea.

Proiektu hau garatzeko, elkarlanean aritu da Maraka. 

Nola heldu diogu

Gabezia horri erantzuteko, 2017ko urtarrilean, gazteekin eta udalerriko bestelako eragile batzuen parte hartzearekin, partaidetzazko ikerketa, ekintza eta diseinu prozesu bat jarri zen abian, 4 urte iraun dituena. Hainbat fasetan garatu da, eta 2019ko abenduan behin betiko zerbitzu-eredura iritsi ginen.

Prozesua lau fase nagusitan antolatu da: ikertu, sortu, prototipatu eta definitu.

1. IKERTU
Testuingurua ulertzeko fasea. Udalerriko gazteria eta bere testuinguruan parte hartzen duten eragileak identifikatzeko eta ezagutzeko, ikerketa kuantitatibo eta
kualitatiboaren konbinazio batekin hasi zen prozesua, eta egoeraren diagnostikoa eratu zen.
Fase honetan honako hauek egin ziren: proiektua udalarekin batera sortu, arakatzeko safariak, elkarrizketa pertsonalak gazteekin eta haien inguruko bestelako eragileekin (elkarteekin, senideekin, ikastetxeekin), eta joeren eta erreferentziazko ekimenen bilaketa eta analisia, besteak beste.
Fase horretatik eratorritako emaitzak proiektuaren irudia, gazteen errealitatearen argazkia eta hurrengo faseetan jorratu behar ziren diseinu-erronken sorta bat izan ziren.

2. SORTU
Ikerketa fasean identifikatutako behar eta nahiei aurre egiteko proposamenak sortzeko fasea izan zen hau. Udalak gazteei zuzendutako zerbitzuen proposamen baten ildoak definitzea izan zen fase honen helburua.
Fase hau partaidetza saioen bidez garatu zen eta, ondoren, lantaldearen barne lanarekin osatu zen. 3 partaidetza saio egin ziren: 2 saio adin tartearen arabera antolatutako gazteekin, eta 1 Udaleko teknikari eta arduradun politikoekin.
Fase honen emaitza gisa, lehen eskaintza-prototipoa sortu zen, «gazte ideia deialdia» formatuan.

3. PROTOTIPATU
Prototipo bat behin betiko diseinua ekoitzi aurretik lantzen den eredua da. Horrek proposamenaren hainbat alderdi baloratu edo baztertzeko balio du. Prototipatzeko fasea izan zen prozesuko luzeena, eta hainbat mailatan garatu zen.
1. prototipoa jarduerak programatzeko ideien deialdi bat izan zen, eta urtean zehar gazteen programazioa modu parte-hartzailean definitzearen egokitasuna berresteko helburua zuen.
Deialdiaren bidez, gazteek egin nahi zituzten ekintzak proposatu ziren, eta ekintza horiek garatzeko konpromisoa hartu zen, hainbat lan-saiotan parte hartuz eta horretarako mekanismoak abian jarriz.
2018ko udazkenean bigarren prototipoa atera zen, berriz ere ideien deialdiaren formatuarekin, lehen edizioko ereduari jarraituz eta berritasun txikiren bat aplikatuz. Nabarmenena, deialdia espazio berrirako proposamenak jasotzeko egin zela. Espazioa aurretik bazegoen eta gaur egun gazteria zerbitzuaren egoitza da: Etxego.
Hilabete horietan zehar, Etxegon hainbat ekintza egin ziren modu jarraituan eta, horri esker, Iurretako Udalaren gazteentzako eskaintza sendotu zen. Horretarako, gutxieneko ekipamendua definitu eta erosi egin zen. Aukeraketa gazteekin eta hezitzaileekin batera egin zen.

4. DEFINITU
Prototipatzeko fasean egindako ekintza eta lan egiteko moduetatik eratorritako ondorioetatik, Udal Gazteria Zerbitzua definitu zen eta, haren baitan, Etxego eraikina berritzeko proiektua zehaztu zen.
Horretarako, 2017 eta 2019 bitartean egindako guztiaren sakoneko azterketa egin zen, eta topaketak egin ziren Udalarekin, jarduerak eta espazioa erabili zituzten gazteekin eta bestelako eragileekin (hezitzaileak eta beste berri batzuetako Gazteria Zerbitzuetako arduradunak). Saio horietan landutakotik, zerbitzuaren oinarriak prestatu eta adostu ziren.